ako
ang agila
na nagnanais kumawala
sa haraya
ng bawat walang muwang na bata
ang magandang musikang
hindi mo maririnig
ngunit hayaan mong kulayan ito
ng aking mga pinsel
ang pakpak
ang pakpak ng pangarap
na napugto
nang ako’y mangahas
na makipagsapalaran sa malayo
ang tula
na isinulat sa puti at bughaw
nang makita ang nakaraan
sa kasalukuyan
at sa darating na hinaharap
ang pag-aasam
na nasa puso ng bawat isa
na isinantabi
sa pagdaan ng mga taon
sa akin na lamang
magugunita
ang bukang-liwayway
kapag ang lahat
ay bumalik sa abo
sa pagbitaw mo sa akin
ako na ang sari-saring kulay
ng puti at itim
No comments:
Post a Comment